《有傘的牙籤》
咩叫代溝？只要有年紀嘅你就會明，因為係日常生活中，你會比細你十年或二十年嘅人一句輕描淡寫地話你聽你老喇。
或者係你講出一句周星馳嘅經典對白時佢唔明，又或者係你講一個名詞例如屈機佢唔知點解，而我遇到嘅係，一個唔知飲茶曾經係會推車仔嘅零零後。
咩話？你唔知咩係推車仔？睇返《新精武門》你就會知，咩係唔似貓唔似狗個幕，有冇發現好多酒樓都仲有一張開位嘅卡，上面有大中小特點，但通常依家都無乜用，淨係用黎寫人數同枱號，然後拎去埋單。
今時今日仲會推車仔嘅酒樓應該兩隻手數得晒，上星期特登去蓮香居重拾返昔日嘅回憶，真係令人既懷念又傷感……
推車仔同寫點心紙唔同，你永遠都唔知呢間酒樓仲有乜特色，會唔會有驚喜，當年應該仲係小學生，同埋細佬一齊拎住張點心紙成間酒樓行，走去每架點心車度問有乜野食，一籠籠點心好神秘，因為以你嘅高度係未必睇到有乜食，只可以靠阿姐話你知，仲有幾檔炒蒸煮檔口，即係特別貴個幾樣野，豬腳薑啊，煎腸粉之類等等。
當年酒樓好熱鬧，人來人往，除咗你要周圍行去搵點心之外，仲有一班人係企係枱旁邊等位，有時好似威脅咁幾個人一齊望住人食，再用眼神同你講，食完好走喇，大堂仲會傳出一陣陣電話音，我唔知點形容，然後你會聽到陳師奶一號線聽電話，王佰三號線有人搵你等等，當年仲未有手提電話，你約左人又可能會遲到，又或者你想知佢係唔係度，你唯一方法就係打去酒樓睇吓佢會唔會聽電話。
酒樓樓下必定有檔報紙檔，當年報紙檔就勁喇，簡直係百花齊放，你睇報紙檔有乜賣，真係可以睇你十幾廿分鐘，仲會有玩具賣，成班細路同埋表兄妹就一齊去報紙檔買野，然後交換睇，老夫子好似係八蚊定十蚊一本，黃巴士，兒童周刊，叮噹都係廿蚊左右，然後到後期嘅coco同金田一等等，都係唔同年代你會係酒樓買黎睇，坐定定嘅讀物，而父母係呢個時候都會好爽手比你買野睇，因為你買完就會坐定定唔會周圍惹事生非嘛。
而我最有印象嘅一定係插住雨傘牙籤嘅啫哩，應該係小點黎，但阿媽就一定會話，幾蚊嘅野係酒樓用幾倍價錢買個小小，唔得，返屋企整比你食咪得嚟打發我哋，而永遠返到屋企阿媽都會當無回事，我心諗，就算你整到都唔會有把雨傘係上面咁趣致啦！
今日去飲茶，門口唔再一定有報紙檔，有都好，都無乜野你係會想買嚟睇；亦唔會企枱邊等位，甚至乎用apps拎飛仔；大家有電話，唔好話打，直程係whatsapp聯絡就算喇，唔會再有酒樓嘅電話通知；車仔，有地方都仲有，今日我想食乜，唔需要問準任何人，想食就食，但食嚟食去，都好似仲差咁少少野咁。
或者進步就係咁，係一種無話可說。
所有野都方便咗，所有野都乾淨咗，而即叫即蒸亦應該係好食咗，今日我哋再去到完全舊式酒樓飲茶都好，都唔會係你細個時嘅感覺。
二人限聚之下，我同老婆一路飲茶，一路懷念住當年，佢細我幾年，都有部份野佢唔會聽得明，亦唔知道某一種點心係我當年一定食嘅。
懷舊完，我影咗張相send比屋企人，話限聚完之後，我哋一齊去食仲推緊車仔嘅酒樓啦。
我比較好彩，即使環境唔同咗，人都仲係度，最傷感嘅係有一日，物是，人非。
今日再睇呢把有傘嘅牙籤，我好努力去回憶返當年點解咁重視，咁鍾意同咁開心，或者我都進步咗，眼角高咗，而幸福快樂嘅線亦高咗，咁，應該係好事？
Search